ရွေးကောက်ပွဲ ကော်မရှင်က ဖြန့်ဝေလိုက်သည့် မွန်ပြည်နယ် တိုင်းဒေသကြီး (သို့) ပြည်နယ်လွှတ်တော်အတွက် တိုင်းရင်းသားလူမျိုး မဲဆန္ဒပေးခွင့်ရသူ စာရင်းတွင် မဲပေးခွင့်ရှိသူ မွန်လူမျိုး၏စာရင်းကို အတိအကျ ဖော်ပြထားခြင်းမရှိဘဲ ဖျောက်ဖျက်ထားကြောင်း သိရှိရသည်။
ထိုစာရင်းတွင် မွန်ပြည်နယ်၌ မဲပေးခွင့်ရှိသူ စုစုပေါင်း (၁၂) သိန်းကျော်အနက် ဗမာလူမျိုး (၄၂၁,၄၇၀) ဦး၊ ပအိုဝ်းလူမျိုး (၃၃,၁၆၅) ဦး၊ ကရင် (၁၄၃,၅၀၆) ဦး ရှိကြကြောင်း ကိန်းဂဏန်းဖြင့် အတိအကျ ဖော်ပြထားသော်လည်း မွန်လူမျိုးဇယားကွက်တွင် တစုံတရာ ဖော်ပြထားခြင်း မရှိဘဲ ကွက်လပ်အဖြစ်သာ ထားရှိကြောင်း မွန်ဒေသလုံးဆိုင်ရာ ဒီမိုကရေစီပါတီ (အေအမ်ဒီပီ) မှ မြို့နယ် စည်းရုံးရေးတာဝန်ခံတဦးက ပြောကြားသည်။
“တိုင်းရင်းသားလူမျိုးတွေ ခွဲပြီး ပြထားတဲ့ ဇယားထဲမှာ ပါတဲ့ ရှမ်း၊ လီဆူး၊ ရဝမ်၊ ချင်း တို့အကွက်လိုပဲ မဲပေးခွင့်ရှိတဲ့ မွန်လူမျိုး အရေအတွက်အကွက်မှာ ဘာမှ ရေးမထားဘူး ခင်ဗျ၊ ဒါဟာ ပြည်သူတွေ ရွေးကောက်ပွဲအပေါ် စိတ်ဝင်စားမှု နည်းတာကို အခွင့်ကောင်းယူပြီး တမင်လုပ်တာ ဖြစ်တယ်။ နိုင်ငံရေးပါတီတွေ ထင်ယောင်ထင်မှား ဖြစ်စေဖို့ ရည်ရွယ်ချက်ရှိရှိနဲ့ လှည့်စားသလို ဖြစ်နေတာပေါ့” ဟု ၎င်းက ခေတ်ပြိုင်သို့ ပြောကြားသည်။
ယင်းကဲ့သို့ ဖော်ပြထားခြင်း မရှိ၍ မဲပေးခွင့်ရှိသူ ဗမာ၊ ပအိုဝ်း၊ ကရင် ဦးရေ စုစုပေါင်းမှလွဲ၍ ပြည်နယ်လွှတ်တော် မဲဆန္ဒရှင်စာရင်းအရ ကျန်သည့် မဲဆန္ဒရှင် (၆) သိန်းခွဲမှာ မွန်လူမျိုးဟု မွန်ဒေသလုံးဆိုင်ရာ ဒီမိုကရေစီပါတီက မှတ်ယူထားသည်ဟု ဆိုသည်။
သို့သော် ရွေးကောက်ပွဲကော်မရှင်က ထုတ်ပြန်ထားသည့် မဲပေးခွင့်ရှိသူ အရေအတွက် မှန် မမှန် စစ်ဆေးရန်၊ တိုက်ကြည့်ရန်အတွက် ငွေအား၊ လူအား၊ အချိန် လုံလောက်မှု မရှိခြင်းတို့ကြောင့် အေအမ်ဒီပီအနေဖြင့် လုပ်ဆောင်နိုင်ခြင်း မရှိသေးကြောင်း သိရသည်။
မွန်ပြည်နယ်တွင် ပြည်နယ်လွှတ်တော်နှင့် ပြည်သူ့လွှတ်တော် မဲဆန္ဒရှင်စာရင်းတွင်မူ မဲပေးခွင့်ရှိသူ ဦးရေ (၁,၂၅၃,၇၁၂) ဦး ရှိကြောင်း ရွေးကောက်ပွဲကော်မရှင်က ထုတ်ပြန်လိုက်သည့်စာရင်းတွင် ဖော်ပြထားသည်။
အဆိုပါ အေအမ်ဒီပီ စည်းရုံးရေးမှူးက “ဥပမာ မဲပေးခွင့်ရှိသူ သောင်းဂဏန်းလောက် ရှိနိုင်တဲ့ ရေးမြို့နယ်၊ လမိုင်းမြို့မှာဆိုရင် မဲပေးခွင့်ရှိသူ အရေအတွက် (၆,၈၅၈) ယောက်ပဲ ရှိတယ်လို့ ရေးထားတယ်။ တချို့ရွာတွေဆို တင်ပြတဲ့လူဦးရေ နည်းနေတယ်ဆိုပြီး ကျေးရွာ စာရေးတွေကနေတဆင့် မဲပေးခွင့်ရှိတဲ့ လူဦးရေ စာရင်းကို ထပ်ဖြည့်ခိုင်းတာတို့၊ တရွာမှာ အယောက် (၃,၀၀၀) ထက် စာရင်းမကျော်ဖို့ ညွှန်ကြားတာတို့ မွန်ပြည်နယ်အနှံ့မှာ ဖြစ်ပျက်နေတယ်။ ဒါက ဘာဖြစ်လာသလဲဆိုတော့ မဲပေးတဲ့လူဦးရေ ဘယ်လောက်ပဲ သတ်မှတ်သတ်မှတ်ထားပေါ့။ အယောက် (၁) ထောင်မှာ မဲလာထည့်တဲ့ (၁၀) ယောက်၊ အယောက် (၁၀၀) ပဲ ရှိရင်လည်း ဒီရွေးကောက်ပွဲက အထမြောက် အောင်မြင်တာပဲဆိုတော့ ကျေးရွာလူကြီးတွေကလည်း ရမ်းသမ်းပြီး လူဦးရေစာရင်းတွေ တင်နေတာ ဖြစ်တယ်” ဟု ဆိုသည်။
အဆိုပါစာရင်းအရ ပြည်နယ်လွှတ်တော်၊ အမျိုးသားလွှတ်တော်နှင့် ပြည်သူ့လွှတ်တော်တို့အတွက် မော်လမြိုင်မြို့နယ် မဲဆန္ဒနယ် (၂) ခုတွင် မဲပေးခွင့်ရှိသူ (၁၇၁,၈၅၂) ဦး၊ ကျိုက်မရော (၁၃၈,၂၄၉) ဦး၊ ချောင်းဆုံ (၁၀၈,၉၃၆) ဦး၊ မုဒုံ (၁၃၂,၄၄၄) ဦး၊ သံဖြူဇရပ် (၉၇,၄၈၇) ဦး၊ ရေး (၁၅၀,၆၄၃) ဦး၊ သထုံ (၁၄၀,၅၅၅) ဦး၊ ကျိုက်ထို (၈၁,၈၃၂) ဦး၊ ဘီးလင်း (၈၉,၀၂၀) ဦး၊ ပေါင် (၁၄၂,၆၉၄) ဦး ရှိသည်။
အဆိုပါ ဦးရေသည် မွန်ပြည်နယ် မော်လမြိုင်ခရိုင်နှင့် သထုံခရိုင်ရှိ မြို့နယ်ပေါင်း (၁၀) ခုကို မြို့နယ် (၁) ခုလျှင် မဲဆန္ဒနယ် (၂) ခုစီခွဲကာ မဲဆန္ဒနယ်အားလုံး (၂၀) ခု သတ်မှတ်ပေးထားခြင်းဖြစ်သည်။
ယင်းဆန္ဒမဲပေးခွင့်ရှိသူ စာရင်းကို ပြီးခဲ့သည့် စက်တင်ဘာ (၂၀) ရက်နေ့မှစ၍ မြို့နယ်၊ ကျေးရွာ ရွေးကောက်ပွဲကော်မရှင်ခွဲများထံသို့ စတင် ဖြန့်ဝေပေးခဲ့သော်လည်း ကော်မရှင်ရုံးများတွင် လူသိရှင်ကြား ကြော်ငြာကပ်ထားခြင်းမျိုး မဟုတ်ကြောင်း သိရသည်။
မွန်ဒေသလုံးဆိုင်ရာ ဒီမိုကရေစီပါတီ၏ ခေါင်းဆောင်တဦးက “နိုင်ငံရပ်ခြား တိုင်းပြည်တွေမှာ အလုပ်လုပ်နေတဲ့ သန်းချီရှိတဲ့ ဒေသခံ မွန်လူမျိုးတွေရဲ့ စာရင်းလည်း ဒီအထဲမှာ မပါဘူး။ သေချာတာကတော့ ဗမာပြည်အထက်ပိုင်းကနေ မွန်ပြည်နယ်ကို အလုပ်လာလုပ်ကြတဲ့ သိန်းချီ ရှိတဲ့ ရွှေ့ပြောင်းအလုပ်သမားတွေရဲ့စာရင်းတော့ ဒီစာရင်းထဲမှာ မပါပါဘူး။ သူတို့တွေဟာ ခြံတွေ၊ လယ်ယာတွေထဲမှာ နေထိုင်အလုပ်လုပ်နေကြတဲ့သူတွေ ဆိုတော့ သူတို့စာရင်းကို တကူးတက လိုက်ယူမယ့်သူ မရှိဘူးလေ။ ပြီးတော့ ကိုယ့်နာမည်မပါလို့ ကော်မရှင်ရုံးသွားပြီး လျှောက်တဲ့သူလည်း မရှိသလောက်ရှားပါတယ်။ ဒါကြောင့် အချိန်နည်းနည်းလေးအတွင်းမှာ မဲပေးနိုင်တဲ့ လူဦးရေ အတိအကျ သိရဖို့ မလွယ်ဘူး” ဟု ခေတ်ပြိုင်သို့ ပြောသည်။
မွန်ပြည်နယ်တွင် ကျေးရွာပေါင်း (၁,၂၀၀) ရှိသည့်အနက် ကျိုက်ထိုနှင့် ဘီးလင်းမြို့နယ်ရှိ ကျေးရွာအုပ်စု (၉) ခုရှိ ကျေးရွာပေါင်း (၅၀) ခန့်ကို နယ်မြေအေးချမ်းမှု မရှိဟုဆိုကာ အခြားတိုင်းရင်းသားဒေသများနည်းတူ ရွေးကောက်ပွဲ ကျင်းပခွင့်မရှိသည့် ဒေသများအဖြစ် ရွေးကောက်ပွဲကော်မရှင်က ပြီးခဲ့သည့် စက်တင်ဘာ (၁၆) ရက်နေ့၌ သတ်မှတ်ခဲ့သည်။
ခေတ်ပြိုင်သတင်းထောက် ၀ီရ ရေးသားသည်။
New Generation For Free Burma Media 