ဒေါ်အောင်ဆန်းစုကြည်မှ ရခိုင်လေဘေးအတွက် ကူညီသော ကျပ် ၃၉ သိန်းကို လေဘေးသင့် ပြည်သူများထံသို့ နိုဝင်္ဘာလ ၃၀ နေ့မှ ဒီဇင်္ဘာလ ၂ ရက်နေ့ထိ တိုက်ရိုက် သွားရောက်လှူဒါန်းခဲ့သူ အဖွဲ့ချုပ် ရခိုင်ပြည်နယ်စည်း တွဲဘက် အတွင်းရေးမှူး ဦးသိန်းလိူင်နှင့် တွေ့ဆုံ မေးမြန်းချက်

နိရဉ္စရာ။ ။ အခု ကိုသိန်းလိူင်တို့က ဒေါ်အောင်ဆန်းစုကြည်က ပေးပို့ လှူဒါန်းတဲ့ ကျပ် ၃၉ သိန်းကို ဘယ်မြို့နယ်တွေကို သွားရောက်လှူဒါန်းခဲ့ပါသလဲ ခင်ဗျား။

ဖြေ။ ။ ကျနော်တို့ နိုဝင်ဘာ ၂၄ ရက်နေ့ မှာ ဒေါ်အောင်ဆန်းစုကြည်က ကျပ် ၃၉ သိန်း လွဲအပ်ပါတယ်။ ကျပ် ၃၉ သိန်းအပြင် ကျနော်တို့ကို ဗဟိုအလုပ်အမှုဆောင် အဖွဲ့ဝင် ဦးသန်းထွန်းက ကျပ်ငွေ ၅ သောင်း ရှမ်းပြည်နယ်က ဒေါ်ခင်မိုးမိုး၊ ဒေါ်သန်းငွေ၊ ကရင်ပြည်နယ်က ဒေါ်နန်းခင်ထွေးမြင့်တို့လည်းဘဲ အဝတ် အထည်တွေကို ထည့်ပေးလိုက်ပါတယ်။ နိုဝင်ဘာလ ၂၇ ရက်နေ့ ကျနော်တို့ စထွက်တယ်။ နိုဝင်ဘာ ၃၀ ရက်နေ့က စပြီးတော့ ဒီဇင်ဘာ ၂ ရက်နေ့ထိ မြေပုံနဲ့ ပေါက်တော မြို့နယ်တွေက ရွာပေါင်း ၆ ရွာကို သွားရောက် လှူဒါန်း ခဲ့ပါ တယ် ခင်ဗျား။ အဲဒီရွာတွေကတော့ ပေါက်တော မြို့နယ်မှာ သဲတွေ၊ ကင်းရွှေ၊ ကွမ်းချိုင် ရွာရယ်၊ နောက်ပီး မြေပုံမြို့နယ်က အမျှက်ထွက်၊ သဲချောင်း ရွာဟောင်း၊ သဲချောင်းရွာသစ် တို့ ဖြစ်ပါတယ်။ အဲဒီလို လှူတဲ့နေရာမှာ ကျနော်တို့ တအိမ်ထောင်ကို ငွေ ငါးထောင်နဲ့ ဆန် ငါးပြည် ကျစီ လှူခဲ့ပါတယ်။ နောက်ပြီးတော့ ကျနော်တို့ ဆေး၊ ရေသန့်ဆေးပြား၊ အဝတ်တို့ လည်း လှူနိုင်ခဲ့ပါတယ်။ လှူတဲ့ နေရာမှာ ကျနော်တို့က ကျေးရွာသားတွေကို ခေါ်လိုက်တယ်။ ခေါ်လိုက်ပြီးတော့ အဲဒီမှာရှိတဲ့ နယ်မြေဒေသခံ တပ်မတော်သားတွေ ရှိတယ်၊ ရယကတွေရှိတယ်။ အကုန်လုံး အိမ်ထောင်စု စာရင်းတွေ တောင်းတယ်။ ညှိနိုင်းပြီး လူတွေခေါ်တယ်။ ခေါ်ပြီးတော့ ကျနော်တို့ဟာ အမျိုးသားဒီမိုကရေစီ အဖွဲ့ချုပ်က လာတာဖြစ်တယ်။ ဒီအလှူတွေဟာ ဒေါ်အောင်ဆန်းစုကြည် ကိုယ်တိုင်လှူတဲ့အလှူတွေ ဖြစ်တယ် ဆိုပြီးတော့ ကျနော်တို့ အသိပေးပါတယ် ခင်ဗျား။ ပေးတဲ့အခါမှာ လူတွေကလည်း တော်တော်ပျော်ရွင်ကြတယ်။ ဒေါ်စုကိုယ်တိုင် လှူတယ်ဆိုတဲ့ အသိလေးဟာ သူတို့ကို ပိုပြီး ပီတိဖြစ်စေတယ်။ အဲဒီလို လုပ်ပြီးတဲ့ အခါမှာ တအိမ်ထောင်စီကို ကျနော်တို့ က စာရင်းဇယားနဲ့ တဦးချင်း လက်မှတ်ထိုးပြီးတော့ ကျနော်တို့ လှူတယ်။ လှူပြီးတဲ့အခါမှာ ကျေးရွာရယက လူကြီးတွေကိုလည်း မှန်ကန်ကြောင်း ထပ်ဆင့် လှက်မှတ်ထိုးပြီးတော့မှ ကျနော်တို့က စနစ်တကျ လှူဒါန်းခဲ့တာဖြစ်ပါတယ်။

နိရဉ္စရာ။ ။ လေဘေးသင့် ဒေသတွေကို ကိုယ်တိုင် သွားရောက် အကူညီပေးခဲ့တယ်ဆိုတော့ လေဘေးသင့် လူထုတွေရဲ့ နောက်ဆုံး အနေထားကို ဘယ်လို တွေ့ခဲ့ရပါလဲ။

ဖြေ။ ။ လက်ရှိအနေထားအရတော့ အရေးပေါ်အခြေအနေမှာဘဲ ရှိနေသေးတယ်။ မြို့ပေါ်ရပ်ကွက်နဲ့ သွားလာရေး အဆင်ပြေတဲ့ နေရာတွေမှာ စားရေးသောက်ရေး အဆင်ပြေတယ် ဆိုရပေမယ့်လို့ ကျနော်တို့ ရွာအတော်များများပေါ့လေ– ကျောက်ဖြူ၊ မြေပုံ၊ ပေါက်တော မြို့နယ်က အဲဒီ ရွာ အတော်များများမှာ တော့ တနေ့ စာဘဲ ဆန်ရှိတာ တွေ့ရပါတယ်။ ကျနော်တို့ ဆီမှာလည် လာတောင်းကြတဲ့ ရွာတွေ မနည်း ဘူး ခင်ဗျား။ ထမင်းငတ်နေတဲ့ ကြားထဲက တချို့ ရွာတွေဆို သောက်သုံးရေ လုံးဝ မရှိတဲ့ ရွာတွေလည်း ရှိတယ်။ အဲဒီ ရွာတွေကတော့ မြေပုံမြို့နယ်မှာ ဆိုရင် ရေနီကြီး၊ သင်းပေါင်းချောင်း၊ ဝါးဘော်ကြီး အဲဒီ ရွာတွေဖြစ်တယ်။ မုန်တိုင်းကြောင့် စာသင်ကျောင်းတွေလည်း ပျက်စီးသွားလို့ ဒီနေ့ထိ စာမသင်ရတဲ့ ရွာတွေလည်း တွေ့ရတယ်။ တချို့ရွာတွေမှာ ကျတော့ တဲထိုးပြီး တော့ ကလေးတွေ စာသင်နေတာကို တွေ့ရတယ်။ နောက်တခုက မုန်တိုင်းရဲ့ နောက်ဆက်တွဲ ပြသာနာ ဖြစ်တဲ့ စီးပွားရေး အဆင်မပြေမှုတွေကြောင့် အလယ်တန်းနဲ့ အထက်တန်း ကျောင်းသားတွေဟာ ကျောင်းမတက်ဘဲ ကျောင်းက ထွက်လိုက်ရတာလည်း တွေ့ခဲ့ရပါတယ်။ နောက်တခုက ဝမ်းရောဂါ ဖြစ်ပွားနေတာလည်း ကျနော်တို့ တွေ့ခဲ့ရတယ်။ အထူးသဖြင့် ကျောက်ဖြူ မြို့နယ်နဲ့ မြေပုံမြို့နယ်မှာ ပြင်းထန်လာတာကို တွေ့ရတယ်။ သေဆုံးမှုတွေ ရှိတယ်လို့လည်း သိရတယ်။ နောက်တခါ လုံးဝ ကျနော်တို့ တွေ့ခဲ့ရတဲ့ ရွာတွေရှိသေးတယ်။ အဲဒါက ဘယ်မီဒီယာ မှ သတိမထားမိတဲ့ အချက်လေးပေါ့ ခင်ဗျာ။ အမ်းမြို့နယ်မှာ ရွာတော်တော်များများလည်း ပျက်စီးနေတာကို ကျနော်တို့ တွေ့ခဲ့ရတယ်။ လာပြီးတော့ အကူညီ တောင်းခံတာလည်း တွေ့ခဲ့ရပါတယ်။

နိရဉ္စရာ။ ။ အမျိုးသား ဒီမိုကရေစီ အဖွဲ့ချုပ်က ဘယ်အတိုင်းအတာထိ လေဘေးသင့် ပြည်သူတွေကို လူဒါန်း ကူညီတာ ရှိပါသလဲ။ အဓိက အားဖြင့် ဘယ်ပစ္စည်းတွေကို လှူဒါန်းခဲ့ပါသလဲ။

ဖြေ။ ။ ကျနော်တို့က ၂၀၁၀ နိုဝင်ဘာလ ၂ ရက် နေ့မှာ ရခိုင်ပြည်နယ် အဖွဲ့ချုပ်က နေပြီးတော့ မုန်တိုင်းသင့် ပြည်သူတွေ ကူညီကယ်ဆယ်ရေး ယာယီကော်မတီကို အဖွဲ့ဝင် ၁၅ ဦး ပါပြီးတော့ ဖွဲ့စည်း ခဲ့ပါတယ်။ အဲဒီက စပြီး ကျနော်တို့ နိုင်ဝင်ဘာလ ၂ ရက် ၃ ရက်နေ့မှာ ကျောက်ဖြူ မြို့နယ်မှာ ကျနော်တို့ ရွာ ၆ ရွာကို သွားရောက်ပြီး မုန်တိုင်းသင့် ပြည်သူတွေကို ဆန်အိတ် ၁၀၀ လှူခဲ့ပါတယ်။ အဲဒီရွာတွေက တောင်ရင်း၊ ဆားပြင်ကွင်း၊ ဥက္ကာသိမ်၊ လောဒတ်၊ အဆိုင်းကြီး၊ တန်းခရုတ် ရွာတွေဖြစ်တယ်။ ကျနော်တို့ ကော်မတီကဘဲ ဒုတိယ အကြိမ် နိုဝင်ဘာ ၁၁ ရက်နေ့မှာ မြေပုံမြို့နယ်မှာ ရွာ ၄ ရွာ ဆန်အိတ် ၁၀၀ နီးပါး နဲ့ အဝတ် ၅ ထုတ် လှူခဲ့တယ်။ အဲဒီရွာတွေကတော့ ငပသုန်၊ ရေနီကြီး၊ သင်းပေါင်းချောင်း၊ ဝါးဘော်ကြီး ရွာတွေဖြစ်တယ် ခင်ဗျား။ ဒီလှူဒါန်းတဲ့ နေရာမှာ ထူးခြားတာကတော့ တောင်ကုတ်မြို့နယ် ဘုရွှေမော် ရွာကနေပြီးတော့ ဆန်အိတ် ၂၀ နဲ့ ကြိုကိုင်း ရွာက ဆန် ခြောက်အိတ်နဲ့ အဝတ် ၅ ထုတ်ကို ကျနော်တို့နဲ့ အတူလာပြီးတော့ မုန်တိုင်းသင့် ပြည်သူတွေ အတွက် တပါတည်း လာလှူ ပါတယ် ခင်ဗျား။

နိရဉ္စရာ။ ။ အမျိုးသား ဒီမိုကရေစီ အဖွဲ့ချုပ်က သွားရောက်လှူဒါန်းတဲ့ အခါမှာ သက်ဆိုင်ရာ အာဏာပိုင်တွေတို့၊ စစ်တပ်နဲ့ ရယကတို့က ဘယ်လို တုန့် ပြန်မှုတွေ ရှိပါသလဲ။

ဖြေ။ ။ ကျနော်တို့ကို သက်ဆိုင်ရာ အာဏာပိုင်တွေရယ်၊ တပ်မတော်သားတွေရယ်၊ ရယက အဖွဲ့ဝင်တွေနဲ့ ဂေါပက အဖွဲ့တွေက ဘာမှ ဟန့်တား နှောင့်ယှက်မှုမျိုး မရှိပါဘူး။ မြို့ပေါ် နေရာတွေ ဖြစ်တဲ့ ကျောက်ဖြူမြို့နဲ့ မြေပုံမြို့တို့မှာတော့ စောင့်ကြည့်တဲ့ သဘောတော့ ရှိပါတယ်။ ပြည်ခိုင်ဖြိုးပါတီက ပုဂ္ဂိုလ်တွေတော့ စောင့်ကြည့်တာရှိတယ်။ နယ်တွေမှာ သွားလှူတဲ့ အခါမှာတော့ ဘာမှ အနှောင့်အယှက် မရှိပါဘူး။

နိရဉ္စရာ။ ။ ဂီရိသင့် ပြည်သူတွေကိုကော စစ်အစိုးရဘက်က ဘာတွေ ကူညီပေးနေတာတွေ ရှိနေသလဲ။ မျက်မြင် ဘယ်လို တွေ့ခဲ့ရတယ်ဆိုတာ ပြောပြပေးပါလား။

ဖြေ။ ။ ကျနော်တို့ မြင်ရတာက အလှူရှင်တွေ အနေနဲ့ မြို့ပေါ်နဲ့ သွားလာရ လွယ်ကူတဲ့ နေရာတွေမှာဘဲ တွေ့ရတယ်။ NGO တွေကလည်း မြို့မှာ ရုံးစိုက်ထားတာ တွေ့ပါတယ်။ ဒါပေမဲ့ နယ်တွေမှာ အထူးသဖြင့် မြေပုံမြို့နယ်မှာ ဆိုရင် ကျနော်တို့ ကယ်ဆည်ရေး အဖွဲ့တွေဟာ မော်တော်နဲ့သွားရင် မြစ်ပြင်မှာ မော်တော်ဘုတ်တွေကို ရပ်ထားပြီး ချောင်းထဲကို ကျဉ်းကျဉ်းကျပ်ကျပ် လှေတွေနဲ့ ဝင်ပြီးတော့ ရွာတွေကို တနာရီလောက် သွားပြီးတော့ ကူရတာရှိတယ်။ ကျနော်တို့ဆိုရင် ပေါက်တောကို အသွားမှာ ကျောက်တန်း တစ်ခုပေါ်ကို ဖြတ်မိတဲ့ အတွက်မို့လို့ မော်တော် တစီးလုံး ပျက်စီးပြီး လူတွေ သေမယ့် အနေထားမျိုးထိ ကျနော်တို့ ရင်ဆိုင်ခဲ့ရတယ်။ ဒီလို အခက်ခဲမျိုးတွေ ရှိနေတဲ့ အတွက်မိုလို့လည်း ကျေးလက် တောရွာတွေမှာ အကူအညီတွေ မရောက်ရှိတာဖြစ်ပါတယ်။ မရောက်တဲ့ အခါမှာ အဲဒီမှာ တာဝန်ထမ်းဆောင်နေတဲ့ တပ်မတော်သားတွေနဲ့ သံဃာတော်တွေ အပါအဝင် သူတို့က မြို့တွေကို သွားပြီးတော့ တနေ့ကို ဆန်နို့ဆီ ၂ လုံး ၃လုံး ရဖို့အတွက် လုပ်ပေးနေတာတွေ၊ ကူညီ တောင်းပေးနေရတာတွေ ရှိပါ တယ်။ တခြားကယ်ဆယ်ရေး လုပ်ငန်းနဲ့ ပတ်သတ်လို့တော့ မကြား ရပါဘူး။ သူတို့ ပြောတဲ့ အတိုင်းဘဲ ကျနော် ပြန်ပြောတာပါ။

နိရဉ္စရာ။ ။ လေဘေးသင့် ပြည်သူတွေအတွက် အမျိုးသားဒီမိုကရေစီ အဖွဲ့ချုပ် (ရခိုင် ပြည်နယ်) အနေနဲ့ နောက်ထပ် သွားလှူမည့် အစီစဉ်များရှိပါသလား။

ဖြေ။ ။ ဟုတ်ကဲ့။ ကျနော်တို့ ဆက်တိုက် သွားလှူမှာပါ။ ကျနော်တို့ အဖွဲ့ရဲ့ ရည်ရွယ်ချက်ကိုက ကျနော်တို့ဟာ ပံ့ပိုး ကူညီမဲ့သူတွေဖြစ်တယ်။ ကိုယ်တိုင် သွားလှူမယ့် အလှူရှင်တွေလည်း ရှာဖွေမယ်။ နောက်ပြီးတော့ ပြည်တွင်း ပြည်ပက လာလှူတဲ့ အလှူရှင်တွေကိုလည်း သူတို့ကိုယ်တိုင်သွားရင်လည်း ကျနော်တို့က လိုက်ပါကူညီဆောင်ရွက်ပေးမယ်။ ကျနော်တို့ အဖွဲ့ချုပ် ဗဟိုကဖြစ်စေ၊ ကျနော်တို့ ပြည်နယ်က ဖြစ်စေ လှူဒါန်းတဲ့ နေရာမှာလည်းကျနော်တို့ စနစ်တကျ လုပ်မေးမယ်။ အဲဒီလို ရည်ရွယ်ချက်နဲ့ လုပ်တဲ့ အတွက်ကြောင်း ကျနော်တို့ တစိုက်မတ်မတ် ပြန်လည်ထူထောင်ရေးကာလ ပြီးဆုံးတဲ့ အထိ ကျနော်တို့ ကူညီပံ့ပိုးသွားမှာ ဖြစ်ပါတယ်။

နိရဉ္စရာ။ ။ အခု အကူညီတွေကို ဘယ်လို နာမည် အဖွဲ့ကို သုံးပီး လှူဒါန်းနေတာပါလဲ ။

ဖြေ။ ။ အမျိုးသား ဒီမိုကရေစီ အဖွဲ့ချုပ် ( ရခိုင်ပြည်နယ်) ဂီရိမုန်တိုင်းသင့် ပြည်သူများ ကယ်ဆည်ရေးနဲ့ ပြန်လည် ထူထောင်ရေး ကူညီပေးရေး ကော်မတီ ဆိုပြီးတော့ ကျနော်တို့ ဖွဲ့ထားတာ ရှိပါတယ်။ အဲဒီနာမည်နဲ့ သွားရောက် ကူညီပေးနေတာ ဖြစ်ပါတယ်။

နိရဉ္စရာ။ ။ ပြည်နယ် အဆင့်နဲ့ ဖွဲ့စည်းထားတာလား။ တနိုင်ငံလုံး အတိုင်းတာရ ဖွဲ့စည်းထားတာပါလား။

ဖြေ။ ။ ကျနော်တို့က ပြည်နယ်စည်း အနေနဲ့ ရခိုင်ပြည်နယ် ကနေပြီးတော့ ဒေါ်စု မလွတ်ခင်ကတည်းက နိုဝင်ဘာ ၂ ရက်နေ့မှာ ကိုယ်ပြည်နယ် အတိုင်းတာရ ဖွဲ့ထားတာဖြစ်ပါတယ်။

နိရဉ္စရာ။ ။ နောက်ဆုံး အနေနဲ့ ဒေါ်စုက လေဘေးသင့် ရခိုင်ပြည်သူတွေနဲ့ ပတ်သက်ပြီး ထုတ်ဖေါ် ပြောကြားတာများ ရှိပါသလား၊ ရှိရင် နည်းနည်း ပြောပြပေးပါလား။

ဖြေ။ ။ ဒေါ်စုကို ကျနော်တို့က မေတ္တာရပ်ခံတာ ရှိပါတယ် ခင်ဗျား။ နိုဝင်ဘာ ၂၄ ရက်နေ့မှာ ကျနော်တို့ ဒေါ်စုနဲ့ ပြည်နယ်စည်းနဲ့ တွေ့တဲ့ အခါမှာ ကျနော်တို့က ဒေါ်အောင်ဆန်းစုကြည် အနေနဲ့ ဂီရိမုန်တိုင်းသင့် ပြည်သူတွေ ဒုက္ခရောက်နေတာကို ကယ်တင်ဖို့အတွက် နိုင်ငံတကာ အဖွဲ့စည်းတွေ၊ နိုင်ငံတကာ အစိုးရ သံတမန်တွေကို ဒီထက် အလှူဒါန်းတွေ ပိုလှူဒါန်းပေးဖို့ မေတ္တာရပ်ခံပေးပါလို့ ကျနော်တို့ဘက်က တောင်းဆိုခဲ့တာ ရှိပါတယ်။ အဲသလို တောင်းဆိုတဲ့ အခါမှာ ဒေါ်စုက ကျမအနေနဲ့ တတ်နိုင်သမျှကို တာဝန်ယူ ဆောင်ရွက်ပေးမယ်။ ကျမ ကိုင်တွယ်ထားဖို့ အတွက် သေချာတဲ့ အချက်လက်တွေကို ပြုစုပေးကြပါဆိုလို့ ကျနော်တို့က အိမ်အပျက်စီး စာရင်းတွေကို တင်ပြပေးခဲ့ပါတယ်။ နောက်ရေရှည် ပြန်လည်ထူထောင်ရေး လုပ်ငန်း အတွက် ကျနော်တို့ ငါးဖမ်းပိုက်တွေ၊ စက်လှေတွေ၊ လူအသေပျောက် စာရင်းတွေ၊ နောက်ပီးတော့ ဆည်မြောင်း၊ တာတမံ ကျိုးပေါက်တာတွေ စသဖြင့် ကျန်တဲ့ အဆောက်ဦး အပျက်စီးတွေအကုန်လုံးကို ကျနော်တို့ အသေးစိတ် စာရင်း ပြုစုနေပါတယ်။

ဒါ့အပြင် ဒေါ်စုက မုန်တိုင်းသင့် ရခိုင်ပြည်သူတွေကို ကိုယ်နဲ့ ထပ်တူ ကိုယ်ချင်းစာ တယ်လို့ ပြောပါတယ်။ နိုင်ငံတကာက အကူအညီ ရရှိရေးကိုလည်း ကြိုးစား ဆောင်ရွက်ပေးမယ်ဆိုပီး ပြောသလို မုန်တိုင်းသင့် ရခိုင်ပြည်သူတွေ ဘ၀ တစ်ခုကို ငြိမ်းငြိမ်းချမ်းချမ်းနဲ့ ပြန်လည် ထူထောင်နိုင်အောင် ကြိုးစားပေးမယ်လို့ ပြောပါတယ်။ ရခိုင် ပြည်သူတွေကို နိုင်ငံရေး အရလည်း အထူးကျေးဇူးတင်တယ်လို့ ပြောပါတယ်။

(ပြီး)

လေဘေးသင့် ဒေသမှ ရယက ဥက္ကဌတစ်ဦးကို စစ်ဗိုလ် တစ်ဦးမှ ကိုယ်ထိ လက်ရောက် စော်ကား

ရခိုင်ပြည်နယ် ပေါက်တောမြို့နယ် ငရဗချိုင် ကျေးရွာမှ ရယက ဥက္ကဌ တစ်ဦးကို နအဖ စစ်ဗိုလ် တစ်ဦးမှ ပြင်းပြင်းထန်ထန် ကိုယ်ထိလက်ရောက် ရိုက်ပုတ် စော်ကားသော ဖြစ်စဉ် တစ်ခု ယခုလ ၂ ရက်နေ့က ဖြစ်ပွား ခဲ့သည်။

ဒီဇင်္ဘာလ ၂ ရက်နေ့ ညနေ ရ နာရီ ၃၀ မိနစ် အချိန်တွင် လေဘေးဒဏ်ကို အဓိက ခံခဲ့ရသော ပေါက်တောမြို့နယ် ဗျိုင်းသစ်ကျေးရွာ အုပ်စု ငရဗချိုင် ကျေးရွာ ဥက္ကဌ ဦးစိန်လှကျော်အား လေဘေး ကူညီရေး လုပ်ငန်းများ ဆောင်ရွက်ရန် ရောက်နေသော ရသေ့တောင် အခြေစိုက် ခမရ ၅၃၈ မှ ဗိုလ်ကျော်ကျော်အောင်မှ သူတည်းခိုရာ နေရာသို့ ခေါ်ယူပြီး ပြင်းပြင်း ထန်ထန် ရိုက်နက် ကန်ကျောက်မူများ ပြုလုပ်ခဲ့သည်။

ဒီဇင်္ဘာလ ၂ ရက် နံနက် ၇ နာရီတွင် ပြင်ဖြူချိုင် ကျေးရွာသို့ သွားရောက်လိုသဖြင့် စက်လှေ စီစဉ်ပေးရန် ဗိုလ်ကျော်ကျော်အောင်မှ ပြောသည်ကို တစ်နာရီ နောက်ကျပြီး နံနက် ၈နာရီတွင် စီစဉ်ပေးခဲ့သည့် အပေါ် မကျေနပ်ရာမှ ပြင်ဖြူချိုင် ကျေးရွာမှ ပြန်အရောက် ညနေ ရ နာရီတွင် ဥက္ကဌ ဦးစိန်လှကျော်အား သူတည်းခိုရာ နေရာသို့ ခေါ်ယူပြီး အရက် သောက်စားထားသော ဗိုလ် ကျော်ကျော်အောင်မှ ခေါ်ယူရိုက်ပုတ် နှိပ်စက်ခဲ့ခြင်း ဖြစ်သည်။

စက်လှေများမှာ လေဘေးဒဏ်ကြောင့် ယိုယွင်းပျက်စီးနေပြီး စက်များကို ကုန်းပေါ်တင်ထားရာမှ စက်ကို ပြန်တပ်ရသဖြင့် အချိန် တစ်နာရီ ကြာမြှင့်ခဲ့သည့် အပေါ် မကျေနပ်ရာမှ ယခုကဲ့သို့ ရိုက်ပုတ်ခဲ့ခြင်း ဖြစ်ကြောင်း သိရသည်။

ရခိုင်ပြည်နယ် အတွင်း တပ်စွဲထားသော ဗမာ စစ်တပ်သည် ယခုကဲ့သို့ ကျေးရွာ လူကြီး ရယက ဥက္ကဌများကိုပင် မထင်ရင် မထင်သလို ကိုယ်ထိ လက်ရောက် ရိုက်ပုတ် စော်ကား တတ်သဖြင့် သာမန် ရခိုင် ပြည်သူများ အခြေအနေမှာ ဖက်ဆစ် ဂျပန် လက်အောက်ကို ရောက်ရှိနေသော အခြေ အနေထက် ဆိုးရွားနေကြောင်း ဒေသခံ ရခိုင်ပြည်သူများထံမှ ပေးပို့သော စာတွင် ဖေါ်ပြသည်။

( ဖြစ်စဉ် အသေးစိတ်နှင့် ဥက္ကဌ ဦးစိန်လှကျော်မှ အထက်သို့ တိုင်ကြားစာအား အောက်တွင် ဖတ်ရှု့နိုင်ပါသည်။)


ကုလားတန် စီမံကိန်းတွင် ပါဝင်သည့် စစ်တွေ ဆိပ်ကမ်း စတင်တည်ဆောက်

အိန္ဒိယနှင့် ဆက်သွယ်မည့် ကုလားတန် မြစ်ကြောင်း ဘက်စုံ တိုးတက်ရေး စီမံကိန်းတွင် ပါဝင်သော စစ်တွေ ဆိပ်ကမ်း တည်ဆောက်ရေးကို အခု အခါ စတင် လုပ်ကိုင်နေပြီ ဖြစ်ကြောင်း သတင်း ရရှိသည်။ စီမံကိန်း အရ စစ်တွေ ဆိပ်ကမ်းကို အသုံးပြုပြီး ကုလားတန် မြစ်ကြောင်းမှ တဆင့် အိန္ဒိယ အရှေ့မြောက် ပြည်နယ်များ ဖြစ်ကြသော မီဇူရမ်နှင့် အာသံပြည်နယ်များကို ဆက်သွယ်ဖေါက်လုပ်မည့် ကုန်သွယ်ရေး လမ်းကြောင်း ဖြစ်သည်။

စစ်တွေ ဆိပ်ကမ်း စတင် တည်ဆောက်နေကြောင်းကို စစ်တွေမြို့ခံ တစ်ဦးက ယခုကဲ့သို့ အတည်ပြု ပြောကြားသည်။

“အခု သူတို့က စစ်တွေ ဆိပ်ကမ်းဟောင်း အင်းပေါက်ဝကနေ ကမ်းနားလမ်း တလျောက်ကို မြေတွေ စတင် ဖို့နေပါတယ်။ သဲတွေကို လော်ရီကားတွေ တင်လာပြီး မြေဖို့နေတာ ဖြစ်ပါတယ်။ အိန္ဒိယ နိုင်ငံသား အင်ဂျင်နီယာတွေလည်း တွေ့တယ်။ သူတို့က ဆိပ်ကမ်းသာ ဟိုတည်မှာ တည်းခိုနေကြတာ ဖြစ်ပါတယ်။”

ယခင်က စစ်တွေ ဆိပ်ကမ်းကို တည်ဆောက်ပါက အထင်ကရ နေရာများ ပြောင်းရွှေ့ရမည်ဟု သတင်းများ ထွက်ပေါ်ခဲ့သော်လည်း ယခုအခါ အဆိုပါ သတင်းမှာ တိတ်ဆိတ်နေကြောင်း သူက ဆက်ပြောသည်။

“အရင်ကတော့ စစ်တွေ ဆေးရုံကြီးကို ဝေသာလီ အားကစားကွင်းဘက်ကို ပြောင်းမယ်။ ဈေးကြီးကိုတော့ ယခင်က သင်္ချိုင်းဟောင်း အာဂျိတ်တောင်ကုန်းကို ပြောင်းမယ်ဆိုပီး သတင်းတွေ ထွက်ခဲ့တာ ရှိပါတယ်။ အခုတော့ ဒီသတင်းတွေကို မကြားရတဲ့အတွက် လူတွေကတော့ ဆိပ်ကမ်းဆောက်ပေမယ့် စိတ်သက်သာရာ ရသွားခဲ့ကြပါတယ်။”

သို့သော်လည်း စစ်တွေဆေးရုံကြီးမှာ ဆိပ်ကမ်းဆောက်လုပ်သည့် နေရာနှင့် နီးကပ်စွာ တည်ရှိသဖြင့် ကားအ၀င်အထွက် အသံများနှင့် သင်္ဘောသံများကြောင့် ဆူညံမူများ ဖြစ်နိုင်ပြီး လေကောင်း လေသန့် ရနေမူကိုလည်း အဟန့်အတား ဖြစ်သွားနိုင်ကြောင်း သူက ပြောသည်။ ၎င်းပြင် စစ်တွေ ကမ်းနားလမ်း၊ မင်းကြီးကျောက်တန်းနှင့် ပလ္လင်တောများလည်း ပျက်စီး ပျောက်ကွယ်သွားနိုင်ကြောင်း သူက ပြောသည်။

“ခုလို အပျက်အစီးတွေ ရှိနိုင်ပေမယ့် ဒီစီမံကိန်းအတွက် အလုပ်အကိုင် အခွင့်အလန်းတွေ ပေါ်ပေါက် လာလိမ့်မယ်လို့တော့ နည်းနည်း မျှော်လင့်မိပါတယ်။ ရခိုင် စီးပွားရေးက လုံးဝ ချွတ်ခြုံကျနေတော့ ဒီစီမံကိန်းက အခွင့်အရေး တစုံတရာ ပေါ်ပေါက်နိုင်မလားဆိုပီး လူတွေက မျှော်လင့်နေကြပါတယ်” ဟု သူက ဆက်ပြောသည်။

အဆိုပါ စီမံကိန်း အတွက် အိန္ဒိယ အစိုးရက အမေရိကန် ဒေါ်လာ သန်း ၁၂၀ ထောက်ပံ့ပေးရန် မြန်မာ စစ်အစိုးရနှင့် ၂၀၀၉ ခုနှစ် ဧပြီလက သဘောတူ လက်မှတ်ရေးထိုးခဲ့သည်။ စီမံကိန်း၏ အဓိက အရေးပါသော စစ်တွေ ဆိပ်ကမ်း စီမံက်ိန်းကို စတင် ဆောက်လုပ်နေပြီ စီမံကိန်း တခုလုံးကို ၂၀၁၃ ခုနှစ်တွင် အပြီးသတ် ဆောင်ရွက်မည်ဟု သ်ိရသည်။

ကုလားတန် မြစ်ကြောင်း စီမံကိန်းမှာ အိန္ဒိယ အရှေ့ မြောက် ပြည်နယ်များအား စစ်တွေ ဆိပ်ကမ်းကို အသုံးပြုပြီး နိင်ငံတကာ ကုန်သွယ်ရေး လမ်းကြောင်းနှင့် ဆက်စပ်မည် ဖြစ်သောကြောင့် ဒေသအတွင်းမှာ စီးပွားရေး ဖွံ့ဖြိုး တိုးတက်မူများ ရှိလာနိုင်မည်ဟု အများက ခန့်မှန်း ပြောဆိုမူများ ရှိနေသည်။

သို့သော်လည်း သဘာဝ ပတ်ဝန်းကျင် ထိန်းသိမ်း စောင့်ရှောက်သူများမှ ကုလားမြစ် ဘက်စုံ စီမံကိန်းကြောင့် သဘာဝ ပတ်ဝန်းကျင်နှင့် ရခိုင် ယဉ်ကျေးမူ ဆိုင်ရာ အမွေအနှစ်များ ပျက်စီး ဆုံးရှုံးမူများ ရှိနိုင်ကြောင်း ဝေဖန် ပြောဆိုမူများလည်း ထွက်ပေါ်နေသည်။

နိရဉ္စရာသတင်းထောက် မေဖြိုးအောင် ရေးသားသည်။

နိုင်ငံရေး အကျဉ်းသားများ လွှတ်မြောက်ရေး အတွက် ကျောက်ဖြူတွင် တကိုယ်တော် ဆန္ဒပြသူ ပြင်းထန်စွာ ရိုက်နှက်ခံရ

နိုင်ငံရေး အကျဉ်းသားများ လွှတ်မြောက်ရေး အတွက် မော်တော် ဆိုင်ကယ် စီးပြီး တကိုယ်တော် ဆန္ဒပြသူ ကျောက်ဖြူမြို့မှ ကိုထွန်းနုအား ရဲအရာရှိများက ပြင်းပြင်းထန်ထန်ရိုက်နှက် စစ်ဆေးမေးမြန်းခဲ့ကြောင်း သတင်းရရှိသည်။

သူ၏ ဆွေမျိုး တစ်ဦးက “ ကိုထွန်းနုကို နေ့လည် ၁ နာရီမှာ ကျောက်ဖြူရဲစခန်းက ဒုရဲအုပ် ဦးလှအောင်က ဖမ်းဆီးပြီး ရဲစခန်းမှာ ၀ါးရင်းတုတ်နဲ့ ပြင်းပြင်းထန်ထန် ရိုက်နှက် စစ်ဆေးမေးမြန်းခဲ့ပါတယ်။ သူ့ကို ဘယ်သူက လုပ်ခိုင်းသလဲဆိုပီး စစ်ဆေးမေးမြန်းခဲ့တာ ဖြစ်ပါတယ်” ဟု ပြောသည်။

ကိုထွန်းနုသည် နိုဝင်္ဘာလ ၂၅ ရက်နေ့ နံနက် ၁၀ နာရီ အချိန်တွင် ဆိုင်ကယ်တစီးပေါ်တွင် နိုင်ငံရေး အကျဉ်းသားများ ပြန်လွှတ်ပေးပါဟု စာများကပ်ပြီး မြို့ကို ပတ်ကာ ဆန္ဒပြခဲ့သည်။

“ အဲဒီနေ့က ၀န်ကြီးချုပ် သိန်းစိန်လည်း ကျောက်ဖြူကို လာတဲ့နေ့ ဖြစ်ပါတယ်။ အချိန်ကိုက်ပြီးတော့ ဆောင်ရွက်တာ ဖြစ်ပါတယ်” ဟု သူက ဆက်ပြောသည်။

ကိုထွန်းနုအား ဖမ်းဆီးထာကြောင်းကို သူ၏မိဘများထံ ကျောက်ဖြူရဲစခန်းမှ အဆိုပါနေ့  ညနေ ၆နာရီခန့်တွင် လာရောက် အကြောင်းကြားခဲ့သည်ဟု မိသားစု အဖွဲ့ဝင် တစ်ဦးကလည်း ပြောကြားသည်။

“ သူတို့က ကိုထွန်းနုကို ဖမ်းပြီးတဲ့ နောက်ပိုင်းမှာ သူမိဘတွေကို ရဲက ခေါ်ယူစစ်ဆေးပါတယ်။ သူ့ရဲ့ ဖခင် ဦးကျန်လူမောင်ကို အဓိက စစ်ဆေး မေးမြန်းပါတယ်။ အိမ်ကိုလည်း ၀င်ရောက် စစ်ဆေးမူတွေ ပြုလုပ်ပါတယ်။ ပီးရင် တရားရုံးမှာ အမူဖွင့်ထားတယ်ဆိုပီးလည်း ပြောပါတယ်။”

ဦးထွန်းနူ၏ မိဘများမှ တရားရုံးသို့ သွားရောက်ကာ ဦးထွန်းနူမှာ စိတ်ဝေဒနာကို ခံစားနေသောသူ ဖြစ်ကြောင်း လက်မှတ် ရေးထိုးပြီးမှ တရားရုံးမှ ခံဝန်ချက် လက်မှတ်နှင့် လက်ဗွေရိုက်ယူကာ နိုဝင်္ဘာလ ၂၆ ရက်နေ့ ညနေ ၈ နာရီ ၃၀ မိနစ်တွင် ပြန်လည်လွတ်ပေးလိုက်သည်။

ဦးထွန်းနု မိသားစုအား စိတ်ဝေဒနာ ခံစားနေသူ တစ်ဦးဖြစ်ကြောင်း ခံဝန်ချက် လက်မှတ်ရေးထိုးမှ လွတ်ပေးမည်ဟု တရားသူကြီးမှ အကျပ်ကိုင်ခဲ့သဖြင့် မိသားစုက ယခုကဲ့သို့ ခံဝန်ချက် လက်မှတ်ရေးထိုးခဲ့ရခြင်း ဖြစ်ကြောင်း သူက ပြောသည်။

ဦးထွန်းနုမှာ အသက် ၃၂ နှစ် ရှိပြီး ကျောက်ဖြူမြို့ စေတီယျ ကျေးရွာမှ ဖြစ်သည်။

နိရဉ္စရာသတင်းထောက် ထွန်းထွန်း ရေးသားသည်။

ဒေါ်အောင်ဆန်းစုကြည် ရခိုင်လူငယ်များနှင့် တွေ့ဆုံမည်

ရခိုင်ပြည်နယ်ထဲမှ ဒီမိုကရေစီအရေး တက်ကြွစွာ လူပ်ရှားဆောင်ရွက်နေသည့် ရခိုင်လူငယ် ၆ ဦးနှင့် တွေ့ဆုံလိုကြောင်း ဒေါ်အောင်ဆန်းစုကြည်မှ ပြောဆိုသည်ဟု ဒေါ်အောင်ဆန်းစုကြည်နှင့် တွေ့ဆုံခွင့်ရခဲ့သူ ရခိုင်အမျိုးသမီး မပံသုစံက ပြောသည်။

သူမက “ကျွန်မ ဒီလ ၂၄ ရက်နေ့ ညနေပိုင်းမှာ တခြား ခေါင်းဆောင်တွေနဲ့ အတူ ဒေါ်စုကို တွေ့ခွင့် ရခဲ့ပါတယ်။ အဲဒီမှာ ရခိုင်အမျိုးသားတွေဆီက ဒေါ်အောင်ဆန်းစုကြည်ကို ပေးပို့တဲ့ အိတ်ဖွင့်ပေးစာကို သွားပေးစဉ်မှာ ခုလို ပြောဆိုခဲ့တာ ဖြစ်ပါတယ်” ဟု ပြောသည်။

၎င်းပြင်သူမက “ကျွန်မတို့ ရခိုင် လူငယ်တွေက အခု New Generation အဖွဲ့အနေနဲ့ ဒီမိုကရေစီ အရေးအတွက် လူပ်ရှားနေတာတွေ ရှိပါတယ်။ အဲဒီအဖွဲ့ အကြောင်းကို ပြောပြတဲ့ အခါ သူမက လူငယ် ၆ ဦးနဲ့ တွေ့ချင်တယ်လို့ ကျွန်မကို ပြောလိုက်ပါတယ်။ ဘယ်နေ့ တွေ့ဖြစ်မယ်ဆိုတာတော့ မသိရသေးပါဘူး” ဟု ပြောသည်။

ရခိုင်အမျိုးသားများက ဒေါ်စုထံသို့ ပေးပို့သော အိတ်ဖွင့်ပေးစာ ကိစ္စမေးမြန်းရာ သူမက ယခုကဲ့သို့ ပြောသည်။

“ ရခိုင်အမျိုးသားတွေက ဒေါ်စု လွတ်လာပြီးတဲ့နောက်ပိုင်းမှာ အိတ်ဖွင့်ပေးစာတွေကို ရေးသား ပေးပို့ ကြပါ တယ်။ အင်တာနက် အီးမေးလ်က တဆင့် ရေးတဲ့ စာတွေလည်း ပါတာ ပေါ့လေ။ အဲဒီစာတွေကို စုပေါင်းပြီး ကျွန်မက ယူသွားပြီး ဒေါ်စုကို ပေးခဲ့တာ ဖြစ်ပါတယ်။ စာထဲမှာ အများစု ရေးသားထားကတော့ ဂီရိကြောင့် ဒုက္ခရောက်နေကြတဲ့ လေဘေးသင့် ရခိုင်ပြည်သူတွေကို ဒေါ်စု အနေနဲ့ မေ့မထားဖို့နဲ့ ကယ်တင်ဖို့ ဆိုတာရယ်။ နောက်အကြောင်းအရာတွေက လက်ရှိ မီးရထားလမ်းဖေါက်လုပ်နေတဲ့ နေရာမှာ မြောက်ဦးမြို့က ရခိုင် ရှေးဟောင်း အမွေအနှစ်ပျက်စီးဆုံးရှုံးနေတာကို ၀င်ရောက်ဟန့်တားဖို့နဲ့ ကန့်ကွက်ရှုတ်ချပေးဖို့ တောင်းဆိုထားတဲ့ စာတွေ ဖြစ်ပါတယ်။ ဒေါ်စုဟာ တိုင်းရင်းသားတွေရဲ့ ခံစားနေရတဲ့ ခံစားမူတွေကို နားအလည်ဆုံး ဗမာ ခေါင်းဆောင် တစ်ဦးဖြစ်တဲ့ အတွက် ရခိုင်လူမျိုးတွေရဲ့ ယုံကြည်မူတွေကို ပိုရအောင် ဒါတွေကို လုပ်ဆောင်ပေးဖို့ တိုက်တွန်းရေးသားထားတဲ့ စာတွေ ဖြစ်ပါတယ်။”

အဆိုပါ အိတ်ဖွင့်ပေးစာတွင် ရေးသားထားသော စာများကိစ္စကို ဒေါ်အောင်ဆန်းစုကြည်မှ ယခုကဲ့သို့ ပြန်ပြောခဲ့သည်ဟု သူမက ပြောသည်။

“ ဒေါ်စုက လက်ရှိ ဂီရိ မုန်တ်ိုင်းကြောင့် ရခိုင်ပြည်သူတွေ အတိဒုက္ခခံစားနေရတာတွေကို ကြားသိ နေရ တယ်လို့ ပြောပါတယ်။ ဒါတွေအတွက် သူမ အနေနဲ့ အထူး စိတ်မကောင်းဖြစ်ကြောင်း ပြောဆိုပါတယ်။ ရခိုင်လေဘေးအတွက် သိန်း ၅၀ သူမအနေနဲ့ ကူညီပေးထားတယ်ဆိုတဲ့ အကြောင်း ပြောပါတယ်။ မြောက်ဦးမှာ ရခိုင်ရှေးဟောင်း ယဉ်ကျေးမူ အမွေအနှစ်တွေကို ဖျက်ဆီးနေတဲ့ ကိစ္စ ဒေါ်စု အနေနဲ့ လေ့လာဖို့ လိုနေသေးတယ်လို့ ပြောပါတယ်။ သူမအနေနဲ့ ကန့်သတ်ချက်တွေ များစွာရှိနေသေးတဲ့ အတွက် လူသိရှင်ကြား ထုတ်ဖေါ် ပြောဆိုနိုင်ခြင်း မရှိသေးတာကို နားလည် ခွင့်လွှတ်ဖို့ ပြောပါတယ်။”

၎င်းပြင် ဒေါ်အောင်ဆန်းစုကြည်မှ ရခိုင်အမျိုးသားများကို သူမ အနေနဲ့ အလေးထားပီး သူမထံသို့ စာရေးသား ပေးပို့ကြသည့် အတွက် ကျေးဇူးတင်ကြောင်း ပြောဆိုသည်ဟု မပံသုစံက ပြောသည်။

“ ဒေါ်စု ပြောတာကတော့ တိုင်းရင်းသားတွေက ဗမာတွေကို မကျေနပ်မူတွေ ရှိနေတုန်းဘဲလို့ ပြောပါတယ်။ ခုလို ဖြစ်ရတာကလည်း မဆလ ခေတ်နဲ့ လက်ရှိ စစ်အာဏာရှင်တွေ ခေတ်တလျောက်မှာ တိုင်းရင်းသားတွေ အပေါ် ဖိနှိပ်မူတွေ ရှိခဲ့လို့ ဖြစ်တယ်။ ခုလို အခြေအနေတွေကြောင့် တချို့ တိုင်းရင်းသားခေါင်းဆောင်တွေ ဆိုရင် အခုအချိန်ထိ သူမနဲ့ လက်တွဲ လုပ်ဆောင်ဖို့ မ၀ံ့မရဲ ဖြစ်နေတုန်းဘဲလို့ ပြောပါတယ်။ ဒါပေမယ့် ရခိုင် ခေါင်းဆောင် အများစုကတော့ သမိုင်းအရ မကျေနပ်မူတွေ ရှိနေပေမယ့် သူမနဲ့ လက်တွဲပြီးတော့ မြန်မာ ဒီမိုကရေစီအရေး အတွက် ပူးပေါင်းဆောင်ရွက် လုပ်ကိုင်နေတာတွေ ရှိတယ်။ အဲဒီအတွက် သူမအနေနဲ့ ကျေးဇူးတင်ကြောင်းနဲ့ ၀မ်းသာတယ်လို့ ပြောဆိုပါတယ်။”

မပံသုစံမှာ ရခိုင်အမျိုးသမီး ခေါင်းဆောင် တစ်ဦး ဖြစ်ပြီး လူမူရေး လုပ်ငန်းများကို တက်ကြွစွာဆောင် ရွက်နေသူ အမျိုးသမီး တစ်ဦး ဖြစ်သည်။

ရထားလမ်းကြောင့် ရခိုင်ရှေးဟောင်း အမွေအနှစ်များ ပျက်စီး ဆုံးရှုံးနေမှုနှင့် ပတ်သက်၍ ရခိုင် အဖွဲ့ အစည်းများမှ သဘောထား ထုတ်ပြန်

ရခိုင် ရှေးဟောင်းမြို့တော် မြောက်ဦးမြို့ကို ဖြတ်ပြီး ရထားလမ်း ဖေါက်လုပ်နေသဖြင့် ရှေးဟောင်း သမိုင်းဝင် အမွေအနှစ်များ အကြီးအကျယ် ပျက်စီးနေရာ ရခိုင်သံဃာ့သမဂ္ဂနှင့် ရခိုင်ပြည် အမျိုးသား ကောင်စီက နိုဝင်္ဘာလ ၂၂ ရက်နေ့က ကျေညာချက် ထုတ်ပြန်ပြီး ရထားလမ်း ဖေါက်လုပ်နေခြင်းကို ကန့်ကွက် လိုက်ကြောင်း သိရသည်။

ရခိုင်သံဃာ့သမဂ္ဂမှ ကျေညာချက် ထုတ်ပြန်ရခြင်းနှင့် ပတ်သက်ပြီး ဥက္ကဌ ဆရာတော် ဦးသီဟက ယခုကဲ့သို့ မိန့် ကြားသည်။

“ ထုတ်ပြန်ရတဲ့ ရည်ရွယ်ချက်က လူမျိုးတမျိုးမှာ အဓိက စံသတ်မှတ်ချက်ဟာ အဲဒီ လူမျိုး တမျိုးရဲ့ ရှေ့ဟောင်း ယဉ်ကျေးမှု အနုပညာ လက်ရာတွေပေါ်မှာ မူတည်လို့ ရှိပါတယ်။ အဲဒီ လူမျိုး တမျိုးရဲ့ စံချိန် စံညွန်း ဟာလည်း အဲဒီလူမျိုး တမျိုးရဲ့ သမိုင်းနောက်ခံ အပေါ်မှာ အခြေ တည်နေတဲ့ အတွက်ကြောင့် အခု နအဖ စစ်အစိုးရက ဖေါက်လုပ်နေတဲ့ ရထားလမ်းဟာ လူသားတွေအတွက် အကျိုးပြုဖို့ ဆိုတာထက် ရှေးဟောင်း အမွေ အနှစ်တွေကို ပျက်စီးနေတယ်လို့ ဦးဇင်းတို့ မြင်တယ်။ ခံစားမိတယ်။ နောက်တချက်က ဘိုးတော်မောင်ဝိုင်း သိမ်းပြီးတဲ့ နောက်ပိုင်းက ပြောင်းလို့ ရတာတွေ ကို ပြောင်း၊ ယူလို့ရတာတွေကိုယူ၊ ယူလို့မရတာတွေကို မီးတိုက်ဖျက်ဆီးခဲ့တယ်။ အဲဒါတွေကို မကျေနပ်တဲ့ တိုင်အောင် ယနေ့ထိ ရခိုင်ယဉ်ကျေးမှုတွေကို ဖျက်ဆီးလာ တယ်။ ရခိုင် ယဉ်ကျေးမှု တွေကို ဗမာ ယဉ်ကျေးမှုပြုလာတယ်။ ဒီလိုဖျက်ဆီးလာတာတွေကို လက်ပိုက်ကြည့်မ နေနိုင်၊ ဒါကြောင့် ကန့်ကွက် ရတာဖြစ်ပါတယ်။”

ရခိုင်သံဃာ့သမဂ္ဂအနေဖြင့် အဆိုပါရှေ့ဟောင်းအမွေအနှစ်တွေဖျက်ဆီးနေမှုကို ရပ်တန့်စေရန် အတွက် ကမ္ဘာ့ ကုလသမဂ္ဂ အပါအ၀င် ရှေးဟောင်း သုတေသနအဖွဲ့များနှင့် နိုင်ငံတကာ အဖွဲ့ အစည်းများကို တိုင်ကြားရန် အစီ အစဉ်ကို မကြာခင် အကောင်အထည်ဖေါ် လုပ်ဆောင်မည်ဟု ဆရာတော်က ပြောသည်။

ယခုကဲ့သို့ နအဖ စစ်အစိုးရ၏ စစ်တွေ-အမ်း ရထားလမ်းပိုင်း ဖေါက်လုပ်နေရာတွင် ရှေးအဟောင်း အဆောက်အဦးများ ဖျက်ဆီးခံနေရခြင်းမှာ ရည်ရွယ်ချက် ရှိရှိ ပြုလုပ်နေခြင်းဖြစ်သည်ဟု ရခိုင်ပြည် အမျိုးသား ကောင်စီ အထွေထွေအတွင်းရေးမှူး ကိုထွန်းဇော်က ယခုကဲ့သို့ ပြောသည်။

“ရထားလမ်းဖေါက်လုပ်မှုဟာ ရခိုင်ပြည်ရဲ့ လမ်းပန်းဆက်သွယ်ရေးခက်ခဲတွေကို ကျော်လွှားဖို့ အတွက် စစ်အုပ်စုက ရည်ရွယ်ချက်ရှိရှိနဲ့ ဖွံဖြိုးတိုးတက်ရေးအစီအစဉ်အရ လုပ်တယ်ဆိုလို့ရှိရင် ကျွန်တော်တို့က ကန့်ကွက်စရာ တခုလည်း မရှိပါ။ အခုလက်ရှိမြင်နေရတာက ရခိုင် အမျိုးသားတွေ အပေါ်မှာ သွယ်ဝိုက်တဲ့နည်းနဲ့ ဖိနှိပ်မှုတွေကို ပိုပြီးလုပ်နေတယ်လို့ ယူဆတယ်။ ဒုတိယတချက်က ရန်ကုန် စစ်တွေကားလမ်းဖေါက်တဲ့အခါ တခါအတွေ့အကြုံရခဲ့ပြီ။ ရှေးဟောင်းသမိုင်း အမွေအနှစ် တွေကို ဖျက်ဆီးရုံသာမက ဒေသခံတွေ အတင်းအဓမ္မ လုပ်အားပေးစေခိုင်းခဲ့တယ်။ အဲဒါဟာ ကားလမ်း ဖေါက်တဲ့အခါ ရလိုက်တဲ့အတွေ့အကြုံပါ။ အခု အလားတူဘဲ မီးရထား လမ်းဖေါက်လုပ်တဲ့ အခါမှာလည်း မြောက်ဦးမြို့မှာဆိုရင် အားလုံးမြင်ကြတဲအတိုင်းဘဲ။ ဆုံးရှုံးပျက်စီးမှုတွေဟာ သိသိ သာသာ ဖြစ်နေပါတယ်။ ANC အနေနဲ့ သဘောထားရှိတာက အဲဒါတွေဟာ ရည်ရွယ်ချက်ရှိရှိနဲ့ ဖျက်ဆီး နေတယ်လို့ ကျွန်တော်တို့ သုံးသပ်မိပါတယ်”ဟု ပြောသည်။

ယခုဖေါက်လုပ်နေသော ရထားလမ်းနှင့် ယခင် ရန်ကုန်-စစ်တွေ ကားလမ်း ဖေါက်လုပ်စဉ်ကလည်း ဓည၀တီ မြို့တော်ဟောင်းနှင့် ဝေသာလီ မြို့တော်ဟောင်းများကို ဖြတ်ပြီး ဖေါက်လုပ်ခဲ့သဖြင့် သမိုင်းဝင် အဆောက်အဦးများစွာ ပျက်စီးသွားခဲ့ရသည်ဟု သိရသည်။

ယခု ဖေါက်လုပ်နေသော စစ်တွေ-အမ်း- မင်းဘူးရထားလမ်းမှာ ၁၅၇ မိုင်ရှည်လျားပြီး နအဖ စစ်အစိုးရမှ ၁၀ နှစ်စီမံကိန်းဖြင့် ဖောက်လုပ်နေသော ရထားလမ်းဖြစ်သည်။

နိရဉ္စရာသတင်းထောက် မောင်ရမ္မာ ရေးသားသည်။

ဂီရိ ရံပုံငွေ စတိတ်ရှိုး လူပေါင်း ထောင်ချီ တက်ရောက် အားပေး

ရခိုင်ပြည်နယ် စစ်တွေမြို့တွင် ပြုလုပ်ခဲ့သော ဂီရိမုန်တိုင်းသင့် ပြည်သူများ အတွက် “တွဲလက်ဂရုဏာ” ဟု အမည် ပေးထားသော ရံပုံငွေ ရရှိရေး ရခိုင် စတိတ်ရှိုးပွဲ တခုကို ကျင်းပခဲ့ရာ ထောင်နှင်ချီသော ပရိသတ်များက လာရောက် အားပေးခဲ့ကြသည်။

အဆိုပါ ပွဲကို စစ်တွေမြို့ရှိ City Point စားသောက်ဆိုင် ခြံဝင်းထဲရှိ မြက်ခင်းပြင်တွင် ယခုလ ၁၉ရက်နေ့က ပြုလုပ်ခဲ့ခြင်း ဖြစ်သည်။

ရခိုင်စတိတ်ရှိုးပွဲကျင်းပရခြင်းနှင့် ပတ်သက်ပြီး ရခိုင်တေးရေး/တေးဆို Rapper တူတူ က ယခုကဲ့သို့ ပြောသည်။

“ဂီရိမုန်တိုင်း ရခိုင်မှာ တိုက်ခတ် သွားခဲ့တဲ့ အတွက် ကျနော်တို့ ရခိုင် အနုပညာ အသိုင်းအဝိုင်းက ညီကိုမောင်နှမ တွေလည်း စိတ်မကောင်း ဖြစ်မိကြပါတယ်။ ဒါပေမယ့် ကျပ် ၅သိန်း၊ ၁၀သိန်း လှူဒါန်းဖို့ အခြေအနေ ကလည်း ကျနော်တို့မှာ မရှိဘူး။ ဒီအတွက် ဘာပဲဖြစ်ဖြစ် ကျနော်တို့ မှာရှိတဲ့ အနုပညာ အစွမ်းနဲ့ ရံပုံငွေ ရှာပြီးတော့ လေဘေးသင့် ရခိုင်ပြည်သူ တွေကို ကူညီမယ်ဆိုပြီး ခုစတိတ်ရှိုးပွဲကို လုပ်ဖြစ် သွားကြတာပါ။”

အဆိုပါ စတိတ်ရှိုးပွဲအား မထင်မှတ်လောက်အောင် ပရိသတ်များက လာရောက် အားပေးခဲ့ကြသဖြင့် အလွန်တရာမှ ဝမ်းသာ ပီတိ ဖြစ်မိပါကြောင်း သူက ဆက်ပြောသည်။

“ ဒီပွဲကတော့ တော်တော့ကို ကျေနပ်စရာ ကောင်းတဲ့ ပွဲတပွဲပါ။ ရံပုံငွေ လည်း အတိုင်းအတာတခု အထိ ရခဲ့ပါတယ်။ ပရိသတ်တွေရဲ့ အားရ ကျေနပ်မှုကို အများကြီး ရခဲ့တဲ့ ပွဲတပွဲပါ။ပြီးတော့ ကျနော်တို့ အဆိုတော် တွေကိုယ်တိုင် လက်မှတ်တွေ ရောင်းကြတယ်။ ပစ္စည်း ကရိယာတွေ ပြောင်းတာတို့ စတိတ် စင်ဆောက်တာတို့ကအစ အစကနေ အဆုံးအထိ အားလုံး ဝိုင်းဝန်းပြီးတော့ လုပ်ကြတဲ့ အတွက် အင်မတန် ပျော်ဖို့ ကောင်းပါတယ်။ ပြီးတော့ ကျနော်တို့က ပရိသတ် ၁ထောင်လောက်ပဲ မှန်းထားခဲ့တာပါ။ လူပေါင်း ၂၀၀၀ လောက် လာရောက် အားပေးခဲ့ကြတာကို တွေ့ရလို့ အံ့သြမိသလို ပျော်လည်း အရမ်းပျော်မိပါတယ်။”

စတိတ်ရှိုးပွဲကို စိုင်းဒြား ရခိုင် စည်တော် အဖွဲ့မှ အဖွင့်ရတုနှင့် ဖွင့်လှစ်ခဲ့ပြီး ရခိုင်လူငယ်များက ရခိုင်ယိမ်းဖြင့် တင်ဆက် ဖြေဖျော် ခဲ့ကြသလို ရခိုင် စာရေးဆရာနှင့် ဟာသသရုပ်ဆောင် ဗဂျီးကျော်နှင့် အဖွဲ့မှလည်း အသံတိတ် ပြဇာတ်များကို တင်ဆက် ပြသခဲ့သောကြောင့် ပရိသတ်များက ပိုပြီး စိတ်ကျေနပ်မှု ရရှိသွားကြကြောင်း သွားရောက်အားပေးခဲ့သူ လူငယ်တဦးက ပြောသည်။

ရခိုင်မိုနို အဆိုတော် ဦးမောင်သိန်းကလည်း သူဖြတ်သန်းခဲ့သည့် အနုပညာ သက်တမ်း အနှစ်၂၀ အတွင်းတွင် ယခုကဲ့သို့ အောင်အောင် မြင်မြင်နှင့် စည်းကားသည့်ပွဲမျိုးကို ရခိုင်ပြည်တွင် မကြုံဖူး သေးကြောင်း ပြောသည်။

ဦးဆောင် လှုပ်ရှား ပါဝင်သူ တဦးဖြစ်သူ ရခိုင်သီချင်း ဗွီဒီယိုခွေများကို တည်းဖြတ် ပေးနေသည့် ကိုထွန်းလင်းအောင် (ဒီနွေဦး)ကလည်း အလွန်ပင် စိတ်ကျေနပ်ပြီး ပျော်ရွှင်မိကြောင်း ပြောသည်။

“ကျနော်တို့ ဂီရိမုန်တိုင်းသင့် ပြည်သူတွေ အတွက် ခုလို အောင်အောင်မြင်မြင် လုပ်နိုင်ခဲ့တဲ့ အတွက် ဝမ်းသာ ပီတိဖြစ်မိ ပါတယ်။ တဖက်မှာလည်း မုန်တိုင်းသင့်ပြည်တွေကို ငါတို့ တတ်နိုင်သလောက်တော့ ကူညီနိုင်တော့မယ်ဆိုပြီးတော့ ပိုပြီးပျော်မိပါတယ်။ ပြီးတော့ ပရိသတ်ထဲက ကျေနပ်ပါတယ်ဆိုတဲ့ စကားကိုကြားတိုင်း ကျနော်အခု ထက်ထိတိုင် ဝမ်းသာ မဆုံး ဖြစ်မိပါတယ်။ ဂုဏ်လည်း ဂုဏ်ယူ မိပါတယ်။”

တေးရေး/တေးဆို KB မျိုးမင်းလေးကလည်း စစ်တွေမြို့တွင် တခါမှ မလုပ်ဖူးသေးသော ယခုကဲ့သို့ စည်းကားပြီး အောင်မြင်သော ပွဲမျိုးကို ဂီရိသင့် ပြည်သူများ အတွက် လုပ်ပေးနိုင်ခဲ့သည့် အတွက် ဝမ်းသာ ပီတိ ဖြစ်မိသလို ဂုဏ်ယူမိပါကြောင်း ပြောကြားသည်။

“တွဲလက်ဂရုဏာ” ရခိုင် စတိတ်ရှိုးပွဲတွင် အဆိုတော် များဖြစ်ကြသော ဦးဖော်ဇံ၊ ဦးမောင်သိန်း၊ မြတ်ခိုင်ကျော်၊ ခိုင်ကျော်လင်း၊ ရွှေဘော်သိန်းနှင့် မောင်ကိုကို၊ တူတူ၊ ဒိုးအ်ရီ၊ ကံထွန်းကြည်၊ မျိုးရခိုင်၊ ခိုင်မင်းဟိန်း၊ ခိုင်မင်းသွီး၊ ရဲလင်းအောင်၊ ဇံမင်းအောင်၊ သျှင်ထွီး၊ သန်းဇော်၊ ဖြိုးမောင်ကြီး၊ ညှာစိမ်းခိုင်၊ စောနှင်းနွယ်၊ ရီလှိုင်းပြာ၊ ငြိမ်းစန္ဒာ၊ ဝတီစိုးမိုး၊ ခိုင်သီတာဦး၊ စန္ဒကူး စသည့် ရခိုင်အဆိုတော် ၂၄ဦးမှ ဖျော်ဖြေခဲ့ကြသည်။

“ ရရှိထားတဲ့ ရံပုံငွေကို မုန်တိုင်းသင့် ပြည်သူတွေကို လှူတန်းဖို့ အတွက်ကတော့ ဘယ်လို ပုံစံမျိုးနဲ့ လုပ်မယ် ဆိုတာကိုတော့ ကျနော်တို့ အနုပညာ ညီအကို မောင်နှမတွေ အစည်းအဝေး တခုလုပ်ပြီး ဆွေးနွေးကြမှာပါ။ ကိုယ်တိုင်းသွား ရောက်ပြီး ကူညီကြမယ်လို့ အရင်က စီစဉ် ထားကြတာတော့ ရှိပါတယ်။ များမကြာမှီ လေဘေးသင့် ပြည်သူတွေဆီ အရောက် ကူညီနိုင်တော့မှာ ဖြစ်ပါတယ် ” ဟု အဆိုတော် တူတူက ပြောသည်။

နိရဉ္စရာသတင်းထောက် မင်းဆက်ခိုင် ရေးသားသည်။

Follow

Get every new post delivered to your Inbox.

Join 28 other followers